Sigurður E. Hentar íslenzkan nokkuð frekar ?

    Stjórnarformaður Kaupþings, Herra Sigurður Einarsson,
fer mikinn í viðtali við Viðskiptablaðið í dag, og vill að Íslend-
ingar hendi krónu sinni. Segir hana ekki henta bankanum
sínum og ekki heldur íslenzku þjóðfélagi. Því eigum við að
taka upp evru og ganga í Evrópusambandið. Þessi orð
bankastjórans eru augljóslega svar hans við ummælum
seðlabankastjóra í gær þess efnis að hugmyndir erlendra
fræðimanna að Íslendingar ættu einhliða að taka upp evru
væru fáránlegar og  grátbroslegar.

   Viðbrögð Sigurðar koma hins vegar ekki á óvart. Þessi
ofur-kapitalisti með hátt í milljarð í árslaun finnst eðlilega
orðið of tímafrekt að telja öll launin sín í íslenzkum krónum.
1 evra er jú hvorki meir né minna en  88 krónur. En hvað
þá með íslenzkuna?  Hentar hún nokkuð frekar banka-
stjóranum.? Gefur það ekki augaleið líka að það myndi
verða mun hentugra fyrir hann, banka hans og þjóð-
félagið í heild að taka upp annað tungumál á Íslandi sem
næði yfir mun stærra málsvæði en íslenzkan gerir í dag ?
Og hentar það nokkuð Sigurði  lengur að Íslendingar hafi
full yfirráð yfir sínum gjöfulu fiskimiðum.? Því með inngöngu
í ESB kæmi Sigurður öllum fiskveðikvótanum á Íslandsmiðum
á opinn evrópskan uppboðsmarkað, þar sem hann gengi
kaupum og sölum. Já þar sem Sigurður gæti gerst helsti
milligöngumaður um söluna og hagnast enn meira fyrir sig
og bankann sinn. Og það í EVRUM !

   Hentar sumum nokkuð að tilheyra íslenzku samfélagi og
grunngildum þess ?  Þeir búa jú hvort sem er í allt  öðrum
heimi!

Hefjum viðræður við Þjóðverja !

   Það er alveg ljóst að ef það fer að verða nær daglegir
viðburðir að óþektar herflugvelar fljúgi inn í íslenzka
flugumsjónarsvæðið án þess að tilkynna sig, verður
að bregðast við því með viðeigandi hætti. Íslendingar
geta alls ekki sætt sig við að vera eina Nato-ríkið úti
á miðju Atlantshafi án neinna loftvarna.

  Flug rússneskra herflugvéla upp að lofthelgi Íslands
í dag án þess að tilkynna sig er óþolandi ástand.
Norskar herþotur stugguðu þeim í dag frá lofthelgi
Noregs og Breskar herþotur voru sendar á loft til að
stöðva för rússneskra sprengjuflugvéla sem stefndu
inn  í breska lofthelgi. Hins vegar voru ENGAR her-
þotur sendar til móts við hina óboðnu ,,gesti" til að
forða þeim að fara inn í íslenzka lofthelgi. Svona
ástand verður óþolandi ef fram heldur sem horfir.

   Íslenzk stjórnvöld verða að fara þess á leit við NATO
í ljósi þessa, að herþotur frá bandalaginu verði stað-
settar á Íslandi. Margar vinarþjóðir okkar innan NATO
hafa sýnt okkur skilning á þessu, og má þar nefna
Norðmenn og Dani. Hins vegar er furðulegt að engar
framhaldsviðræður við Þjóðverja hafa átt sér stað,
þótt vilji og áhugi hafi komið fram hjá þeim í viðræðum
við íslenzk stjórnvöld í vor, að koma að loftvörnum
Íslands. Þjóðverjar eiga öflugan flugher, sem þeir
myndu gjarnan að fengi  tækifæri till æfinga og eftirlits
við aðstæður eins og eru á Íslandi. Hvers vegna hafa
framhaldsviðræður við Þjóðverja ekki farið fram ?

  Í dag virðast vinarþjóðir í auknum mæli vera að efna
til sérstaks samstarfs á sviði öryggis- og varnarmála
þvert á öll bandalög. Má þar nefna í dag viðræður
Norðmanna, Svía og Finna. Þar sem Þjóðverjar hafa
ætíð verið okkur einstök vinarþjóð er ekki nema eðlilegt
að við leitum til þeirra. - Á engils-saxa er ekkert  að
treysta!!!

   

Hvenær verða framhaldsviðræður við Þjóðverja ?

  Í maí s.l fóru fram viðræður íslenzkra og þýzkra
embættismanna um öryggis-og varnarmál. Á fund-
inum kom fram áhugi hjá Þjóðverjum um aukið
samstarf við Íslendinga á þessu sviði. Þarna voru
hátt settir embættismenn úr utanríkis- og varnar-
málaráðuneytum Þýzkalands, en af Íslands hálfu
sátu fundinn embættismenn í utanríkis, dómsmála,-
og forsætisráðuneyti. Fundurinn átti sér stað áður
en ný ríkisstjórn tók við hér á landi.

   Á fundinum kom fram áhugi Þjóðverja að taka þátt
í heræfingum hér á landi, auk þess að þýzki flugherinn
kæmi hingað með vissu millibili til æfinga. En þýzki
flugherinn millilenti 122 sinnum á Íslandi í fyrra, en
það voru langflestar millilendingar erlendra flugherja
árið 2006 utan herflugvéla Bandaríkjamanna.

   Því er spurt. Hvenær verða framhaldsviðræður við
Þjóðverja ? Svo virðist að miklar breytingar séu að
verða í samstarfi þjóða á sviði öryggis-og varnarmála.
Ísland á nú í sérstöku samstarfi við Dani og Norðmenn.
Og nú berast fréttir af því að ekki bara Normenn og
Svíar stefna að stórauknu samstarfi í öryggis- og
varnarmálum, heldur vill norski utanríkisráðherrann að
Finnar komi inn í samstarfið líka, en hvorki Svíþjóð né
Danmörk eru aðilar að NATO. - 

  Þar sem Þjóðverjar eru eitt af öflugustu herveldum
heims og hafa ætíð sýnt Íslendingum einstaka vináttu
og virðingu, er ekki nema eðlilegt að þessar tvær vinar-
þjóðir eigi með sér gott samstarf á sviði öryggis- og
varnarmála, eins og á svo mörgum öðrum mikilvægum
sviðum. - Ekki verður því á annað trúað en að framhald
verði á þeim viðræðum við Þjóðverja sem fyrrverandi
ríkisstjórn lagði grunninn að s.l vor.......

Vinstrimennska Geirs

   Forsætisráðherra Geir H. Haarde lét þau ummæli falla
í sjónvarpsviðtali í gærkvöldi að vinir sinir í Framsókn
væru helst til orðnir of vinstrisinnaðir, en færði fyrir því
engin nánari rök. En mætti  ekki heimfæra þessa  full-
yrðingu á Geir sjálfan? Geir H. Haarde stóð nefnilega
til boða í vor að mynda hér sterka borgaralega ríkis-
stjórn með  Framsókn og Frjálslyndum en hafnaði því.
Þar gafst honum einstakt tækifæri að brjóta blað í ís-
lenzkri stjórnmálasögu og skapa tvær fylkingar í stjórn-
málum á Íslandi til frambúðar. Aðra til mið/hægri  á
borgaralegum grunni og hina til vinstri. Þessi í stað
valdi hann þann kost að mynda ríkisstjórn með sósíal-
demókrötunum í Samfylkingunni, og leiða þar með
VINSTRIÖFLIN  til vegs og virðingar í landsstjórninni.

   Hafi einhver virkilega sýnt vinstrimennsku tilburði  
að undanförnu,  þá er það Geir sjálfur !

Forsætisráðherra snuprar viðskiptaráðherra !

   Hvar í veröldinni gæti það gerst að ríkisstjórn sé ÞVERKLOFIN
í jafn miklu  grundvallarmáli og því  hvort gjaldmiðill þjóðar hennar
sé gjaldgengur eða ekki ? Hvar í veröldinni yrði það liðið að sama
daginn sem viðskiptaráðherra lýsir yfir vantrú á gjaldmiðli þjóðar
sinnar segir forsætisráðherra alls ekkert kalla á gjaldmiðilsbreytingu?
Ríkisstjórn sem hefur svona gjörólíka sýn á sjálfum gjaldmiðli sinnar
eigin þjóðar á að afsala sér völdum og fara frá þegar í  stað...

   Eitt að höfuðhlutverkum hverrar ríkisstjórnar er að skapa traust og
stöðugleika í efnahags- og peningamálum. Eitt af aðal hlutverkum við-
skiptaráðherra virðist hins vegar  vera að grafa undan þessum stöðug-
leika og tausti, með sífelldum árásum á íslenzku krónumyntina, nú
síðast í dag. Svona háttarlag ráðherra gengur auðvitað ekki, enda
snupraði forsætisráðherra í Kastljósinu í kvöld viðskiptaráðherrann.
Hann sagði réttilega  ekkert kalla á gjaldmiðilsbreytingu í evru eins
og viðskiptaráðherra þrástagast á nær daglega, íslensk fyrirtæki væru
t.d með gríðarleg viðskipti í dollurum, og jafnvel pundum, og nefndi ál,
ferðamennsku og mjölsölu í því sambandi. Þá sagðist forsætisráðherra
ekkert sjá sem kallaði á, að Íslendingar hrapi að niðurstöðu um jafn
mikilvæg mál og gjaldmiðlamál þótt fyrirtæki eins og Straumur-Burðarás,
hefði ákveðið að skrá hlutafé sitt í evrum.

   Eftir þessi skýru skilaboð forsætisráðherra verður viðskiptaráðherra
að gera annað tveggja, að steinhætta ítrekuðum árásum sínum á þjóðar-
gjaldmiðil Íslendinga, eða segja af sér ráðherradómi.  Haldi klofningurinn
í ríkisstjórninni  hins vegar áfram í stórmáli þessu ber henni að segja af sér.
Því svona geta hlutir ekki lengur gengið.......

Framsókn má vel við una !

   Framsóknarflokkurinn má vel við una og vera stoltur af
því sem fram kemur í breska blaðinu Telegraph í dag, að
Ísland sé í öðru sæti á lista yfir þau ríki í heiminum  þar
sem efnahags- og lífsgæði eru mest. Eftir 12 ára setu í
ríkisstjórn er varla hægt að hugsa sér betri árangur.
Í fyrsta sæti er Noregur, sem vekur þá ekki síður athygli
að bæði þessi ríki standa utan Evrópusambandsins, en
megin rök ESB-sinna hafa byggst á efnhagslegum for-
sendum um að Ísland gangi í Evrópusambandið. Þau
rök halda alls ekki miðað við þessa niðurstöðu.

    Það voru því mikil vonbrigði að Sjálfstæðisflokkurinn
ákvað að slíta hinu farsæla ríkisstjórnarsamstarfi við
Framsóknarflokkinn í vor, en leiða hins vegar vinstri-
öflin í Samfylkingunni til valda.  Eftirmáli núverandi
ríkisstjórnar munu hvergi komast nærri þeim mikla
árangri sem fyrrverandi ríkisstjórn náði, ef fram
heldur sem horfir. Listi Telegraph er byggður á niður-
stöðu rannsóknar þar sem borið var saman efnahags-
líf 183 ríkja. 
 
 

Hálfvelgjan hjá utanríkisráðherra

   Það er aldrei gott þegar stjórnmálamenn eru haldnir
hálfvelgju til mikilvægra mála, og allra síst ráðherra sem
fer með utanríkismál þjóðarinnar. Í Mbl. í dag segist
Ingibjörg Sólrún utanríkisráðherra telja að niðurskurður
á framlögum til framboðs Íslands til Öryggisráðs S.Þ  í
kjölfar umræðu á árinu 2004 og 2005 hafi verið svo
mikil að hætta sé á að Ísland verði af kosningu í ráðið.
Orðrétt segir utanríkisráðherra: ,, Það er alltaf vont að
fara út í hlutina af hálfum hug. Þegar Ísland ákveður að
bjóða sig fram til öryggisráðsins þá hefðu menn auðvitað
þurft að fara í það af heilum hug og standa bæði fyrir um-
ræðu innanlands  og reka málið erlendis."

   Hér er utanríkisráðherra að viðurkenna að framboðið sé
vonlaust, enda stjórnvöld farið í það MEÐ HÁLFUM HUGA
frá byrjun, en smat skal ruglinu haldið áfram með ófyrirsjá-
anlegum tilkostnaði. Hvers vegna ? Hvers vegna tekur 
ekki utanríkisráðherra af skarið og hættir við þetta óraun-
hæfa framboð sem hvort sem er var ekki farið í nema með
hálfum huga að mati ráðherrans ? Hvað hálfvelgja er þetta
eiginlega ?

   Mál sem ekki er farið í með heilum hug og áhuga á ekki
að framkvæma, og því síður að ausa í það af opinberu fé.

   Svo einfalt er það nú !

Jákvæð og neikvæð afstaða hjá utanríkisráðherra

    Utanríkisráðherra fær hrós fyrir að kalla heim íslenzkan
friðargæsluliða, sem starfar hefur sem upplýsingafulltrúi
á vegum þjálfunarverkefnis NATO í Írak. Með þessu er
Ísland að lýsa á taknrænan hátt andstöðu við stríðs-
reksturinn í Írak. - Þá er NATO komið á algjörar villigötur
með því að vera þátttakandi í stríðsátökum í framandi
heimsálfum. Á að halda sig við varnarhlutverk sitt við
N-Atlantsshaf eins og það var upprunalega stofnað til.
Ákvörðun utanríkisráðherra ber því að fagna.

   Hins vegar er utanríkisráðherra og ríkisstjórnin enn
við  sama heygarðshornið varaðandi framboð Íslands
til Öryggisráðs S.Þ.  Á blaðamannafundi í dag tilkynnti
utanríkisráðherra um meiriháttar fundarherferð í sam-
vinnu við alla háskóla landsins þar sem alþjóðamál og
framboðið til Öryggisráðsins verði kynnt. Framboðið var
frá upphafi meiriháttar rugl, og á eftir að kosta skatt-
greiðendur mikla fjármuni, sem betur væri varið í þarfari
hluti, ekki síst, þar sem líkurnar á að Ísland verði kosið í
ráðið eru hverfandi og nánast engar. - Þá er eins og
utanríkisráðherra ofurtúlki enn hlutverk Íslands í
alþjóðamálum, eins og ferð hennar til Mið-austurlanda
í sumar hefur sýnt og sannað. - Það er hættulegt, og
andstætt íslenzkum hagsmunum !!!

Danskir hermenn í óbyggðum Íslands - gott mál !

   Í frétt á Mbl.is er sagt frá því að hópur danskra
hermanna hafi komið með ferjunni Norrænu í morgun.
Með í för höfðu þeir forláta opna torfærubíla til að
æfa sig í akstri í óbyggðum á hállendi Íslands næsta
hálfa mánuðinn. Íslendingar munu vera með í för
Dönunum til leiðsagnar.

  Það  er afar ánægjulegt að samstarf Íslendinga
við sína nágranna og vinarþjóðir  í öryggis- og
varnarmálum skulu stöðugt vera að styrkjast og
taka á sig skýrari mynd. Íslendingar þurfa á næstu
árum að stórauka aðkomu sína að eigin vörnum,
eins og sérhverri sjálfstæðri og fullvalda þjóð sæmir.
Þá er gott að eiga að góða vini, því taka mun sinn
tíma fyrir Íslendinga að aðlagast gjörbreyttum að-
stæðum í því að taka á sig fulla ábyrgð á sínum
öryggis- og varnarmálum. - Og þótt fyrr hefði verið!

Leyniþjónustur sanna gildi sitt !

    Fréttir frá Danmörku herma að danska leyniþjónustan
PET hafi komið upp um hryðjuverk. Menn af erlendum
uppruna hafi verið að leggja á ráðin um hryðjuverk, en
menn þessir tengjast alþjóðlegum hryðjuverkasamtökum,
þar á meðal hinum illræmdu  al-Qaida.

  Í baráttunni gegn hryðjuverkum og alþjóðlegri glæpa-
starfsemi,  eru það nær undantekningarlaust leyniþjón-
ustur viðkomandi landa sem koma upp um áform um
hryðjuverk, og hafa í fjölmörgum málum komið í veg
fyrir að þúsundir saklaustra borgara hafi verið drepnir
eða limlestir síðustu árin. Þess vegna kappkosta öll ríki
til að halda uppi öflugri leyniþjónustu, ekki bara vegna
öryggi ríkisins, heldur og  ekki  hvað  síst  til  að verja
borgarana  fyrir hverskyns vá og glæpum , eins og dæmið 
sannar frá Danmörku í dag.

   Í þessu sambandi er vert að minna á umræðuna hér á
landi þegar fyrrverandi ríkisstjórn kom á fót sérstakri
greiningardeild hjá Ríkislögreglustjóra. Henni er einmitt
falið það verkefni að tryggja öryggi ríkis og þegna og
hafa eftirlit með hryðjuverkum. Þá hrópuðu margir vinstri-
sinnar, þar á meðal einn af núverandi ráðherrum Sam-
fylkingar, að verið væri að koma á fót leyniþjónustu á
Íslandi. Eins og það væri svo voðalegur voðalegur glæpur!

   Er ekki tími til kominn að ekki verði hlustað lengur á orða-
gjálfur örfárra vinstrisinnaðra rugludalla, og að greiningar-
deildin fái hið formlega heiti og hlutverk sem Leyniþjónusta
Íslands ? Eða, í hvaða allt öðrum heimi og við hverjar allt 
aðrar kringumstæður búa Íslendingar miðað við allar aðrar
þjóðir í öryggislegu tilliti  ?