ESB-sinnar í Samtökum iðnaðarins glaðir með stjórnarsáttmálann

   Eins og kunnugt er hefur stuðningur við aðild
Íslands að Evrópusambandinu og upptöku evru
notið mest fylgis hjá Samtökum iðnaðarins. Í Mbl.
í dag er viðtal við Helga Magnússon, formann
samtakanna.

  Í viðtalinu segir Helgi í lokin. ,, Á iðnþingi í mars
hvöttum við til þess að nýtt kjörtímabil yrði notað
til þess að GERA ÚT UM ÞAÐ hvort Íslendingar
ættu erindi í Evrópusambandið og tækju þá upp
evru í leðinni. Þetta þýðir ekki að tala um nema
helstu stjórnmálaflokkar landsins séu tilbúinir til
þess og samstaða náist  í atvinnulífinu og verka-
lýðshreyfingunni. Ég segi það sama og áður: Nú
er nýtt kjörtímabil og hreint borð.  Það gefur tæki-
færi til að hefja þessa umræðu Á ANNAÐ STÍG OG
FÁ NIÐURSTÖÐU.  ÞETTA FINNST MÉR MEGA LESA ÚT
ÚR STJÓRNARSÁTTMÁLANUM."

   Þetta er hárrétt ályktun hjá Helga. Stjórnarsátt-
málinn er það opinn í Evrópumálum að Evrópusam-
bandssinnar geta verið glaðir með sitt og sjá nú
í fyrsta skiptið verulegan möguleikan á að hefja um-
ræðuna á annað og jákvætt stig verandi með mjög
Evrópusambandssinnaðan utanríkisráðherra, auk
Evrópusinnaða ráðherra á sviði viðskipta og iðnaðar.
Evrópusambandssinnar hafa því  aldrei verið í eins
sterkri stöðu og í dag, ekki síst þar sem stjórnarsátt-
málinn gefur þeim einstakt olnbogarymi til að hefja
raunverulegt umsóknarferli  um aðild Íslands að
Evrópusambandinu.

    Hinn opni stjórnarsáttmáli um Evrópumál hefur því
verið þaulhugsaður þegar allt kemur til alls......

Á að veiða hval eða á ekki að veiða hval ?

    Alveg dæmigert um hina nýju ríkisstjórn og
hennar stjórnarsáttmála. Hvergi er minnst á
hvalveiðar eins og um ótal önnur álítamál í
stjórnarsáttmálanum og því tala ráðherrar út
og suður um hvalveiðar eins og svo um mörg
önnur mál. Utanríkisráðherrann er á móti hval-
veiðum en sjávarútvegsráðherra þeim fylgjandi.
Þá er umhverfisráðherrann á móti hvalveiðum.

   Um helgina komu fram mismunandi skoðanir
ráðherra á virkjunarkostum í Þjórsá og verndun
Þjórsárvera, í dag eru það mismunandi skoðanir
ráðherra á hvalveiðum, og hvaða skoðanamunur
verður svo á morgun?

    Var ekki annars einhver að tala um sterka stjórn?
    

Baugstíðindi hvetja ríkisstjórnina til dáða í Evrópumálum.

    Ríkisstjórnin sem sumir vilja kalla Baugsstjórnina
er ekki fyrr sest að völdum að Baugstíðindi fara að
segja henni fyrir verkum. Í leiðara í Fréttablaðinu í
dag segir að ekkert annað stjórnarsamstarf væri
líklegra til að sveigja í átt að Evrópusambandinu
og evrunni.

   Í leiðaranum segir m.a. ,, En þar sem formaður
Samfylkingarinnar er nú orðin utanríkisráðherra
og iðnaðar-viðskipta-og bankamál eru jafnframt
á hendi þess evrópusinnaða flokks má vænta
þess að aukin nálgun við Evrópusambandið
komist  á dagskrá á kjörtímabilinu. Einkum og
sér í lagi ef þær raddir innan Sjálfstæðisflokksins
styrkjast enn, sem kalla á eftir evrunni. Styrkur
þeirra radda hefur greinilega verið að vaxa á
undanförnum misserum, enda mikið um veikleika
krónuhagkerfisins rætt í viðskiptalífinu, einkum og
sér í lagi í fjármálageiranum.

   Að minnsta kosti er ljóst að ekkert annað
stjórnarsamstarf væri líklegra til að sveigja stefn-
una í átt að Evrópusambandinu og evrunni, hvað
sem líður hörðum orðum forystumanna Sjálfstæðis-
flokksins í þeim efnum á síðustu kjörtímabilum".

  Svo mörg voru þau orð og koma heim og saman
við það sem hér hefur verið haldið fram varðandi
myndun núverandi ríkisstjórnar. - Nú er bara að
sjá hvenær ESB-öflin innan Sjálfstæðisflokksins
hefji atlöguna af fullum krafti. Spurningin er ekki
lengur hvort, heldur hvenær

Þátttaka í Öryggisráðinu skandall !

    Er einn af yfirgnæfandi meirhluta Íslendinga
sem aldrei hefur skilið nauðsyn þess að Ísland
taki þátt í Öryggisráðinu. Í það fyrsta kostar
þetta okkur morð fjár sem betur væri varið
í eitthvað annað mun nýtilegra. Svo hitt að
svona þátttaka gæti skaðað  okkur á alþjóða-
vettvangi, því oftar en ekki er þarna verið að
fjalla um hatrammar deilur sem best væri að
smáþjóð eins og Íslendingar væru ekki að
blanda sig í. Frekar ættum við að snúa okkur
að ákveðnum deilumálum og boðið okkar að-
stoð til sátta, eins og t.d Norðmenn hafa gert.

   Það er alveg með ólíkindum hvað örfáir
hégómafullir stjórnmálamenn geta oft leitt þjóð-
ina í miklar blindgötur. - Og enn skal vitlausunni
haldið til streitu þrátt fyrir nýja ríkisstjórn og
þrátt fyrir engar líkur á að Ísland nái kosningu.
Á meðan streyma fleiri hundruð milljónir úr ríkis-
kassanum til að fullnægja þessum örfáu misvitru
stjórnmála- og embættismönnum eftir meiri-
háttar fáfengilegum hlutum.

  
   Þetta er SKANDALL!

Er nýtt vígbúnaðarkapphlaup að hefjast?

  
    Skv.fréttavef MBL.is óskuðu Rússar eftir því
í dag að kallað verði til neyðarfundar til að ræða
saminginn um takmörkun vígbúnaðar, CFE. 
Rússar hóta að hætta þáttöku sinni í samningi
þessum þar sem NATO ríki hafi hann að engu.
Tengist þetta að stórum hluta áætlun Banda-
ríkjamanna að koma upp eldflaugavarnarkerfi
í A-Evrópu, en það mætir haðri andstöðu Rússa.

  Þetta sýnir hversu skjótt getur skipast veður í
lofti þegar öryggis-og varnarmál eru annars
vegar. Við  Íslendingar þurfum því ætíð að huga
vel að okkar öryggis-og varnarmálum ásamt því
að beita okkur í þágu friðar innan allra alþjóða-
stofnana sem fjalla um slík mál og sem við eigum
aðild að. Í þessu tilfelli virðast Bandaríkjamenn 
sem oftar fara offari með því að stefna að upp-
setningu eldflaugavarnarkerfis nánast við fót-
skör Rússa.  Viðbrögð Rússa eru því skiljanleg.

   Það er ánægjulegt að bandariskur her skuli
ekki lengur vera hér á landi. Honum fylgdi
meiri hætta en öryggi. Hins vegar er náin
samvinna  okkar við Dani, Norðmenn, og 
Kanadamenn á sviði öryggis-og varnarmála
mjög mikilvæg, og ekki síst ef Þjóðverjar koma
þar inn. Þetta eru þær þjóðir sem Íslendingar
geta best treyst varðandi þessi veigamiklu mál
ásamt aðildinni  að NATO. - Þá eigum við að
rækta gott samband við Rússa og stuðla að
sem bestu tengslum og samskiptum þeirra við
Nato, hvað sem Bandaríkjamönnum kann að
finnast. 

   Íslendingar eiga því að beita sér innan NATO
gegn áformum Bandaríkjamanna að koma sér
upp eldflaugavarnarkerfi í A-Evrópu. Það þjónar
bersýnilega engum öðrum tilgangi en að stórauka
spennu á þessu svæði auk þess að ýta undir
nýtt vígbúnaðarkapphlaup. Gegn slíku eiga 
íslenzk stjórnvöld að berjast.

Sjálfstæðismenn keyptu köttinn í sekknum í öryggis- og varnarmálum !

    Nú þegar sjálfstæðismenn hafa myndað nýja
ríkisstjórn með Samfylkingunni vakna ýmsar
spurningar, ekki síst  vegna þess að svokallaður
stjórnarsáttmáli virðist afar óljós þó ekki sé
meira sagt. Þannig eru Evrópumálin öll opin og
hinn Evrópusambandsinnaði utanríkisráðherra
með afar frítt spil á hendi í þeim málum, enda
ríkisstjórnin skipuð eitilhörðum ESB-sinnum
a.m.k til helminga. Athygli vekur að ekki bara
í Evrópumálum er allt meir og minna óljóst,
heldur einnig í öryggis-og varnarmálum, en
þar fer utanríkisráðherra með mikið vald og
ábyrgð. Ekki einu sinni þar virðast sjálfstæðis-
menn hafa þótt ástæðu til að hafa málin skýr.

  Á heimasíðu Alþjóðasamtaka herstöðvaand-
stæðinga Friður.is eru lagðar fram ýmsar
spurningar fyrir stjórnmálaflokkanna í að-
draganda kosninga um öryggis- og varnarmál.
Þar kemur m.a fram að Samfylkingin ,,sjái hvorki
þörf á varalögreglu né leyniþjónustu (greiningar-
deild) á Íslandi og telur peningum betur varið
til að styrkja almenna löggæslu."  Þá undirstrikar
Samfylkingin þarna að hún ,,áliti að HERLEYSI og
VOPNALAUS löggæsla sé mikilvæg sérstöðu 
Íslands".

   Athygli vakti að Ingibjörg Sólrún Gísladóttir
kom hvergi inn á öryggis-og varnarmál Íslands
í fyrsta opna viðtali sínu í Mbl í dag. Skýringuna
hlýtur að liggja í algjöru áhugaleysi og beinlínis
andstöðu hennar og Samfylkingarinnar á því
markvissa átaki sem fyrrverandi ríkisstjórn vann
að  í öryggis- og varnarmálum eftir brottför banda-
riska herssins af Íslandi. Þar er kannski komin
skýringin á því að ekkert bitastætt er að finna í
stjórnarsáttmálanum um öryggis-og varnarmál.
Sjálfstæðismenn hafa algjörlega brugðist þarna í
allri áfergju sinna við  að mynda nýja ríkisstjórn
með Samfylkingunni. Og sitja nú uppi með það að
hafa keypt ,,köttinn í sekknum í öryggis- og varnar-
málum þjóðarinnar. - 

     Sem er mjög alvarleg staðreynd....

  

Fámáll utanríkisráðherra um öryggis-og varnarmál.

  Utanríkisráðherra, Ingibjörg Sólrún Gísladóttir
er í opnu viðtali í sunnudagsblaði Mbl. Athygli
vekur hvað Ingibjörg er fámál um öryggis- og
varnarmál. Segir aðeins að ,,brotthvarf Banda-
ríkjahers voru söguleg tímamót".

  Utanríkisráðherra nefnir ekki einu orði hvernig
fráfarandi ríkisstjórn tók á öryggis-og varnarmál-
um við brottför bandariska hersins. Nefnir ekki
á nafn nausyn þess að halda áfram styrkingu
Landhelgisgæslu, varaliðs lögreglu, uppbyggingu
greiningardeilar um innra-og ytra öryggi ríkisins,
aukna samvinnu við Dani og Norðmenn um örygg-
is og varnarmál og hugsanlega samvinnu við
Þjóðverja og Kanandamenn í þeim efnum.
Kemur ekki einu einasta orði inn á að Íslendingar
verði í auknu mæli að axla sjálfir ábyrgð á sínum
varnar- og öryggismálum eins og sjálfstæðri og
fullvalda þjóð sæmir.  Það er því óhætt að segja
að ólíkt  er þeim saman að jafna Inigbjörgu og Val-
gerði Sverrisdóttir fyrrverandi utanríkisráðherra,
sem stóð sig ákaflega vel í þessum málum og 
kom fram fyrir hönd þjóðar sinnar með þjóðlegu
stolti og ábyrgð.

    Hvort þetta sé aðeins fyrirboði um það sem koma
mun skal ósagt látið. En það að utanríkisráðherra
Íslands skuli EKKERT tjá sig um öryggis-og varnarmál
þjóðarinnar í sínu fyrsta opnu blaðaviðtali vekur
furðu, svo ekki sé meira sagt.
    

Framsókn á tímamótum

     Ljóst er að eftir mikið fylgistap Framsóknarflokksins
12 maí s.l,  enn ein formannsskiptin, og nýtt hlutverk
í stjórnarandstöðu, er flokkurinn á tímamótum. Við
blasir mikið uppbyggingastarf hjá Framsókn,  ásamt því
að skilgreina sig upp á nýtt í íslenzkum stjórnmálum.

   Við stjórnarsamstarf Sjálfstæðisflokks og Samfylk-
ingar skapast ný uppstokkun á taflborði íslenzkra
stjórnmála. Hvar Framsóknarflokkurinn tekur stöðuna
á því taflborði getur ráðið úrslitum um uppbyggingu
flokksins í framtíðinni.

  Framsóknarflokkurinn er elstur íslenzkra stjórnmála-
flokka, og á því langa sögu með íslenzku þjóðinni.
Rót  hans kemur úr íslenzkum jarðvegi, og því hefur
hann ætíð hafnað öllum erlendum ismum. Hann er
því sannarlega íslenzkur flokkur sem verður ætið að
taka  mið af íslenzku samfélagi hverju sinni.

   Í flokkslegri uppbyggingu sem framundan er hlýtur
að felast póltísk endurnýjun og endurmat á stefnu
flokksins til ýmissa grundvallarmála.   Framsóknar-
flokkurinn verður þar að skapa sér sterka ímynd í
tengslum við sínar fornu rætur.

  Flokkurinn á að taka upp gjörbreytta stefnu í auð-
lindamálum, þ.s grundvallarviðhorfið á að vera það
að allar íslenzkar auðlindir skulu vera sameign ís-
lenzkrar þjóðar. Þetta felur m.a í sér að flokkurinn
þarf að gjörbreyta stefnu sinni í fiskveiðistjórnunar-
málum þar sem núverandi kerfi verði umbylt.
Núverandi fiskveiðistjórnunarkerfi er gjaldþrota.
Þá  þarf flokkurinn að skerpa  ímynd sína  varð-
andi náttúruvernd og skapa sér sáttarsemjara-
hlutverkið um verndun og nýtingu náttúruauðlinda
Íslands í framtíðinni.

   Í síaukinni alþjóðavæðingu er mikilvægt rúm fyrir
flokk sem vill standa vörð um íslenzkt fullveldi og
sjálfstæði og mikilvæg þjóðleg gildi. Þarna á  Fram-
sóknarflokkurinn tvímælalaust að staðsetja sig sem
hið pólitíska þjóðlega afl í íslenzkum stjórnmálum. 
Afl, sem kjósendur geti treyst. Stjórnmálaafl sem
vill að Ísland standi utan allra ríkjabandalaga, s.s
Evrópusambandsins.

   Það eru því mikilvægir tímar framundan hjá Fram-
sóknarflokknum við að byggja sig upp á ný. Hann
er því á mikilvægum tímamótum í dag. Tíminn mun
hins vegar skera úr um hvernig til tekst.  Tækifærin
eru hins verar fyrir hendi, og því mikilvægt að þau
réttu verði valin.......
     

Evrópusambandssinnuð ríkisstjórn

   Ný ríkistjórn tók við á Íslandi í dag. Ríkisstjórn
sem mun verða mjög Evrópusambandsinnuð
þegar frá líður. Ekki bara vegna þess að helm-
ingur ráherra hennar eru allir yfirlýstir Evrópu-
sambandssinnar, heldur falla nú utaníkismálin
í fyrsta skiptið í hendur manneskju sem vill að
Ísland sæki um aðild að ESB og taki upp evru.

 Stjórnarsáttmálin er ekki bara í heildina mjög
óljós og opinn í alla enda. Kaflinn um Evrópumál
er alveg sérstaklega opinn og óljós sem gerir
það að verkum að utanríkisráðhera fær mjög frítt
spil í Evrópumálum, gagnstætt því sem sumur
ESB-andstæðingar innan Sjálafstæðisflokksins
halda fram. Þar er ekki einu sinni tekið fram að
EES-samningurinn skuli gilda út kjörtímabilið
og ESB-aðild sé þess vegna ekki á dagskrá.
Einungis vitnað í einhverja skýrslu Evrópunefndar
sem verði grundvöllur nánari athugunar á því
hvernig hagsmunum Íslendinga verði í framtíðinni
best borgið gagnvart Evrópusambandinu.

   Utanríkisráðherrar hafa mjög mikil mótandi
áhrif á utanríkisstefnuna hverju sinni, ekki síst
í málaflokkum þar sem ekki er skýrt kveðið á um
stefnu og markmið. Ljóst er að Evrópusambands-
sinninn, Ingibjörg Sólrún Gísladóttir fær ótrúlegt
olnbogarými til að hrinda ESB-áherslum sínum í
framkvæmd á kjörtímabiilinu. Til þess fær hún
ekki bara fullan stuðning ESB-sinna í sínum
eigin flokki, heldur líka dyggan stuðning ESB-
aflanna innan Sjálfstæðisflokksins. En það voru
einmitt þau öfl  sem sóttust hvað fastast eftir
myndun hinnar nýju ríkisstjórnar.

   Frá þjóðlegum sjónarhóli horft er því  fráleitt að
kenna þessa ríkisstjórn við Þingvelli. Ríkisstjórn
sem er eins Evrópusambandssinnuð og raun ber
vitni getur aldrei kennt sig við þann helga stað.

Verður næsti utanríkisráðherra Evrópusambandssinni ?

  Allt bendir til að Sjálfstæðisflokkur og Samfylking
myndi nýja ríkisstjórn næstu daga. Gera má ráð
fyrir að ráðherraembætti skiptist jafnt milli flokk-
ana. Gerist þetta er það í fyrsta skipti sem ríkis-
stjórn Íslands  er a.m.k til helminga skipuð eitil-
hörðum Evrópusambandssinnum. Og það sem
meira er. Allar líkur benda til, að  sjálfur foringi
Evrópusambandssinna á Íslandi, Ingibjörg Sólrún
Gísladóttir, verði næsti utanríkisráðherra.

   Vitað er að innan Sjálfstæðisflokksins eru mjög
sterk öfl sem tengjast viðskiptalífinu sem vilja
aðild Íslands að ESB og að tekin verði upp evra.
Meðan hinn sterki leiðtogi Davíð Oddsson var
formaður Sjálfstæðisflokksins tókst honum að
halda ESB-öflunum innan flokksins í skefjum.
Í dag nýtur hans ekki við lengur, og nú sjást 
þess glögg merki að ESB-öflin innan Sjálfstæðis-
flokksins eru komin á fullt skrið. Það var ekki
síður af tilstuðlan þeirra að samstjórn Sjálfstæðis-
flokks og Samfylkingarinnar er nú að setjast á
koppinn.  Þorsteinn Pálsson fyrrverandi formaður
Sjálfstæðisflokksins og Evrópusinni og Hreinn
Loftsson stjórnarformaður Baugs og mikill Evrópu-
sinni hafa t.d hvatt mjög til myndunar ríkisstjórnar
með Samfylkingunni ekki síður út af Evrópumálum.
Ljóst er þvi að ESB-sinnar innan Sjálfstæðisflokk-
sins hafa náð takmarki sínu í því að tengja nú
mjög náið flokkinn við Samfylkinguna, sem hefur
það á stefnuskrá sinni að Ísland gerist aðili að
Evrópusambandinu og taki upp evru.

   Björn Bjarnason hefur sagt að verði ESB-aðild
sett á dagsskrá klofni Sjálfstæðisflokkurinn. Þess
vegna verður gerð málamiðlun um orðaval í til-
vonandi stjórnarsáttmála, til að friða ESB-and-
stæðinga innan flokksins í byrjun. Hins vegar er
alveg ljóst, að verði Ingibjörg Sólrún utanríkis-
ráðherra mun hefjast kaflaskil í utanríkisstefnu
Íslands í Evrópumálum. Utanríkisráðherra, hver
sem hann verður, mun ávalt setja sitt mark á
íslenzka utanríkisstefnu og ræður miklu um hverjar
áherslunar verða. Og þótt tiltekin ákvæði eru í
stjórnarsáttmála í upphafi kjörtímabils, getur
mat á kringumstæðum breyst, þegar mál hafa
þróast í tiltekna átt. Vitað er að Geir H Haarde
er mun opnari fyrir því að skoða Evrópumálin
en fyrirrennari hans.  Sama er að segja um vara-
formanninn, sem beitti sér mjög í því að hefja
stjórnarsamstarf með Samfylkingunni.

  - Fyrir þjóðlega sinnaða Íslendinga eru því
blikur á lofti ef fram heldur sem horfir.  Íslenzkt
fullveldi og sjálfstæði getur verið í hættu....